*जंगल सफारी*
ःःःःःःःःःःःः🌹
*ससा*
ःःःःःःःःःःःः🌹
सश्याने काहीतरी घोर अपराध केला अन् शिक्षा म्हणून देवाने त्याचे कान ओढले. परिणामी सश्याचे कान लांब झाले, अशी आख्यायिका ऐकिवात आहे. म्हणूनच आजही कुणाकडून काही अपराध झाला तर ज्येष्ठ लोक लहान्यांचे कान धरून त्याला एक प्रकारे शिक्षाच दिली जाते. ससा आहेही खोडकर प्राणी, पण तेवढाच भित्राही आहे. हेअर आणि रॅबीट असे दोन प्रकार ससा या चिमुकल्या प्राण्याचे आहेत. हेअर जातीच्या सश्याचे कान व मागील पाय रॅबीट सश्यापेक्षा लांबीने मोठे असतात. हेअर आपली पिले गवतात प्रसवतात. जन्मत:च त्यांच्या अंगावर मऊसे केस असतात व डोळे उघडे असतात. तर, रॅबीट मातीत बिळे खोदून पिलांना जन्म देतात. साधारणपणे एका महिन्यानंतर ते पळू लागतात व स्वत:चं खाद्य स्वत:च आणून आपला उदरनिर्वाह करतात. पूर्णपणे वाढलेल्या सश्याचे डोके व शरीर मिळून लांबी ४० ते ४५ सेंमी तर वजन २ ते ३ किलोचे असते. सश्यांच्या जाती-जातींमध्येही फरक आढळून येतो. त्यांच्या अंगावरील केस थोडे कडक व खरबडीत असतात. अंगाचा रंग तांबट मातकट असून त्यात थोडा काळसर रंग पसरल्यागत वाटतो. शेपटी तांबडी पण टोकावर काळसर दिसते. पोटाकडील भाग मात्र शुभ्र असतो. मोठमोठी झुडपे असलेली ठिकाणे तसेच लागवडीच्या जागा असणाºया जंगलातील प्रदेश अशा ठिकाणी सश्यांना राहावयास आवडते. आपल्याकडे मुख्यत: खेडोपाडी व लागवडीखालच्या प्रदेशात ते दिसून येतात. उन्हाळ्यात जंगलातील गवत सुकून जाते, अशावेळी ससे गवताच्या शोधार्थ रस्त्याच्या कडेला वा गावात प्रवेशतात. मात्र भूक लागेल तेव्हाच ते बाहेर फिरताना दिसून येतात. मग ती वेळ दिवसाची असो वा रात्रीची. उन्हात त्यांना ऊब हवी असते म्हणून ते गवतात खळा करून विश्राम करतात. आॅक्टोबर ते फेब्रुवारी हा सश्यांच्या प्रसवतेचा काळ असतो. गर्भधारणेचा हा काळ साधारणपणे एक महिन्याचा असतो. एका वेळेला एक-दोनच पिले ते देतात. त्यांचं वैशिष्ट्य म्हणजे हीच पिले जन्मल्यावर पाच-सहा महिन्यात प्रसवतात. परिणामी त्यांची संख्या लगेच वाढते. कोल्हे, मुंगूस, रानमांजरे व कुत्रे हे प्राणी सश्यांचे ‘जानी दुश्मन’ आहेत. त्यांच्यापासून दूर पळण्यासाठी ते गुपचूप खाचाखळग्यात दडून बसतात. तथापि, ससा हा एक पाळीव प्राणी असून त्याचा उपद्रवही हवाहवासा वाटतो. बालकांचा मित्र म्हणून ससा परिचित आहे. बहुतांश घरात त्याचं वास्तव्य असते. भित्रा वाटत असला तरी पाळण्यासाठी मात्र तो जबरदस्त आहे. असे असले, तरी इसापनीतीच्या कथेनुसार धावण्याच्या शर्यतीत कासवच बाजी मारून गेला अन् ससा शर्यत हरला.
ःःःःःःःःःःःः🌹
*निशिकान्त मायी*
विदर्भ/मराठवाडा
मोबाईल 9881152439
ःःःःःःःःःःःः
Comments
Post a Comment